Schnuppe
(Indisponível)
die guete & die grächte
lige längschtens scho
i ihrne bett & touche dür ne töifschlaf
ds buffet isch es schlachtfäud
schtinkt wie ne fisch
es wär würklech es wunder we morn
no öpper am läbe isch
ha ds muu villech e chly vou gno
i ha wyt müesse gah für dir nöcher z cho
& ha dyni abgründ vor ouge gha
leider ersch won i gheit bi
i ha vori e schtärnschnuppe gseh
am himu über mir
ha zwar derby a di dänkt
aber gwünscht - gwünscht han i mir nüt
a däm bild won i mir vo dir ha gmacht
han i baschtlet, putzt & poliert
ha di vermisst & wo du när ändlech da
bisch gsi
hätt i di lieber wieder vermisst
wenn i einisch meh sött e schtärnschnuppe
gseh
am himu über mir
hätt das won i mir würdi wünsche
nüt meh z tüe mit dir
|
|
